Служба Святителю Митрополиту Филарету (Вознесенскому) и святому праведному Филарету Милостивому


Святитель Филарет (Вознесенский)

Икона Святителя Филарета (Вознесенского)

 

 

Служба

Святителю Митрополиту Филарету (Вознесенскому)

и святому праведному Филарету Милостивому

 

Предуведомление:

Освященный Собор Русской Истинно-Православной Церкви постановил совершать память Святителя Филарета (Вознесенского) 1/14 декабря, в день памяти его небесного покровителя, святого праведного Филарета Милостивого. Об этом ходатайствовал наш Леснинский монастырь. Мы руководствовались соображениями уставного характера: совершать память Святителя в день его кончины, совместно с праздником святого Архистратига Божия Михаила и всех Небесных Сил, когда уже положена полная бденная служба с литией, затруднительно. Святому праведному Филарету Милостивому существует простая служба, и её можно легко соединить с празднованием новопрославленному Святителю Филарету. Руководствовались мы еще и тем, что Святитель Филарет очень почитал и любил своего небесного покровителя. В день своего Ангела он всегда рассказывал о нём, предлагая его житие как яркий пример того, что в мiру можно не только спастись, но и достичь высокой святости. Святой праведный Филарет, подвижник VIII века, был мiрским человеком, даже не священником, – подчеркивал в своих проповедях Святитель Филарет, – жил обыкновенной семейной жизнью, был верным, любящим мужем и хорошим отцом, имел много детей. Он управлял большим хозяйством, а к концу жизни стал знатным человеком, патрицием. Всё это не помешало ему исполнять заповеди Христовы и ставить «единое на потребу» превыше всего.

Служба святому праведному Филарету Милостивому была написана известной песнописицей Русского Зарубежья Валерией Константиновной Хеке, которую Митрополит Антоний (Храповицкий) прозвал “Кассией” в память преподобной Кассии, знаменитой византийской песнописицы VIII века. Валерия Константиновна составила службы небесным покровителям Митрополита Анастасия (преподобный Анастасий Синаит) и Митрополита Филарета как бы в подарок им. Как известно, Владыка Филарет часто бывал в Леснинском монастыре, большей частью летом. Но как-то раз он был у нас в свой день Ангела, и привёз с собой службу святому праведному Филарету. С тех пор мы её служим ежегодно, в память о Владыке.

Предлагаем текст этой службы, а также тропарь, кондак и стихиры Святителю Филарету (Вознесенскому), которые к прославлению на Освященном Соборе РИПЦ были переведены с сербского языка. Служба святому праведному Филарету неполная: нет стихир ни на стиховне, ни на хвалитех, – поэтому её будет легко служить вместе со службой новопрославленному Святителю Филарету (Вознесенскому), которую мы надеемся закончить ко дню его памяти.

Монахиня Евфросиния (Молчанова),

Монастырь Леснинской Иконы Божией Матери,

Франция

 

 

Служба святому праведному Филарету Милостивому

Св. прав. Филарет Милостивый

Икона Св. прав. Филарета Милостивого

 

Стихиры на «Господи, воззвахъ» гл. 8

Якоже солнце Богокрасное/ любовiю твоею на злыя и благiя/ возсiял еси Филарете Милостиве/ лучи благотворенiя твоего вселенную просвещая/сердца же верныхъ возгревая и на хвалу тебе подвизая/ темже ныне въ памяти твоей Боголепно веселимся/ и умильно тебе зовемъ/ милость твою изливай на ны присно// чтущiя любовiю твое летнее торжество.

Бога совершеннейшаго подражая/ милость твою изливалъ еси на всяку плоть/ темже и любве Христовы ради обнищавъ/ паки отъ Него сторичное воздаянiе прiялъ еси/ и въ кончине твоей яко солнце просiялъ еси/ Филарете добролюбиве/ не престай убо поминати насъ// чтущiхъ любовiю твое летнее торжество.

Воистину добро возлюбилъ еси/ Филарете любомудре/ доброделанiя истиннаго рачитель бывъ/ и милостiю Богоподражательною всехъ осiявая/ именiе твое Богу взаимъ давалъ еси/ Небесная блага сокровиществуя/ сего ради тя велегласно ныне славимъ/ и любовiю тебе зовемъ// радуйся, Филарете, Богу возлюбленне.

 

Слава гл. 2 Подобенъ: «Егда отъ древа»

Егда зашелъ еси/ отъ очiю любящихъ тя Филарете/ въ преставленiи твоемъ якоже срлнце просiявъ/ царскiй весь градъ потрясеся/ неисчетнымъ множествомъ/ ко одру твоему стекающимся/ и плачъ благосердный вся стогны огласи/ сирымъ и убогимъ къ тебе тепле взывающимъ/ на кого оставляеши насъ/ отче милостиве/ коему ли попеченiю насъ вручаеши/ обаче и во стране земнаго пришельствiя твоего// не престай пещися о душахъ нашихъ.

 

На Стиховне Слава гл. 3

Филарете, Бога милостиваго подражателю/ во дни земнаго житiя твоего/ всемъ къ тебе приходящимъ благотворилъ еси/ коегождо нужду духомъ прозревая/ и по потребе его злато,  сребро или гривны медяны раздая/ темже убо и мене къ тебе ныне приходящаго прiими/ и мое обнищавшее сердце не презри/ но твоими дары, елико разсудиши обогати/ яко да ти благодарне воззову// радуйся отче премилосерднейшiй Филарете.

 

Тропарь гл. 4

Аврааму въ вере подражая/ Iову же въ терпенiи последуя/ отче Филарете/ благая земли разделялъ еси неимущимъ/ и лишенiе сихъ терпелъ еси мужественне/ сего ради светлымъ тя венцемъ увенча Подвигоположникъ Христосъ Богъ нашъ// Егоже моли спастися душамъ нашимъ.

Примечанiе: Тропарь этотъ взятъ изъ Четьи Минеи св. Димитрiя Ростовскаго, такъ же, какъ и Кондакъ после 6-й песни

 

Канонъ гл. 2

Егоже краегранесiе «Филарета солнцеобразную память хвалю»

 

Песнь 1

Ирмосъ: Грядите людiе поимъ песнь Христу Богу раздельшему море и проведшему люди Своя яже свободи отъ работы Египетскiя яко прославися

 

            Филарета прiидите днесь память да празднуемъ веселящеся светло и ликъ согласный составляюще, того бо Христосъ Богъ дивно прослави.

            Именiе твое, Филарете, Богу взаимъ давалъ еси временнымъ вечная,  мудре, купуя темже и сугубое воздаянiе сподобился еси прiяти на земли честiю и на небеси славою венчався.

            Любве Христовы светильникъ истинный бывъ,  никiими же ветры скорбей и искушенiй угасимый,  любовiю божественною сердца верныхъ разжеглъ еси во еже звати ти,  Филарете Боголюбезне,  радуйся.

Богородиченъ:  Архангельское целованiе припевающе,  радуйся немолчно вопiемъ Ти, радости бо всякiя Ты еси вина,  Владычице,  мiру Спасенiе рождши. 

 

Песнь 3

Ирмосъ: Лукъ сокрушися сильныхъ державою твоею, Христе, и силою немоществующiи препоясашася

 

            Руце твои нищимъ и убогимъ, устне же на похвалу Творцу и Богу отверзалъ еси, праведниче, темже тебе Райская врата радостiю отверзошася.

            Егда обнищалъ еси привременне, Филарете, Богу любовь твою испытующу никакоже унывая, упованiе твое на Бога, Иже смиряетъ и возноситъ и богатитъ, возлагалъ еси.

            Текущему богатству сердца твоего не прилагалъ еси, но въ Бозе сiе утверждалъ еси, Филарете мудре, добролюбче истинный.

Богородиченъ:  Анна праведная, веселися со Iоакимомъ светло не по мнозехъ бо днехъ вопити имаши радостно: се во мне насеяся Древа Животнаго корень преславный.

 

Седаленъ гл. 2

Прiидите сотворимъ учрежденiе велiе и пиръ честенъ прiуготовимъ, къ домашнимъ твоимъ глаголалъ еси,  Филарете,  пришествiе самаго Царя со слуги Его въ домъ твой возвещая. Егда же прiиде время изшелъ еси во сретенiе званнымъ нищимъ и убогимъ Царя-града, чудящимся же всемъ зрящимъ сiя вопiялъ еси: сiя суть слуги Царскiя, грядетъ же по сихъ и Самъ Царь, воистину убо Царь царей Христосъ на вечерю твою прiиде Емуже ныне во свете невечернемъ любовiю служиши за Вечерiю Его со святыми возлежа и воспевая песнь страшную,  Серафимы  трегубо песнословимую.

 

Песнь 4

Ирмосъ: Услышахъ Господи славное Твое смотренiе и прославихъ Человеколюбче непостижимую Твою силу

 

            Сребро и злато и гривны медяны людемъ просящимъ у тебе раздая коегождо потребу духомъ прозиралъ еси,  милостиве,  Вседержавнаго Владыки Христа именiемъ мудре управляя.

            Отецъ сирымъ и убогимъ показася Филаретъ добролюбивый и Богомудрый и положи любовь державну крепости своей.

            Любовiю досажденiя и укоренiя снося, богатства же по подобiю Iовлеву лишився, Господь Богъ мой - сила моя, и Той учинитъ нозе мои на совершенiе, вопiялъ еси.

Богородиченъ:  На спасенiе людей Твоихъ исшелъ еси,  Спасе,  отъ Девы предизбранныя воплощся волею,  Юже непрестанно блажимъ.

 

Песнь 5

Ирмосъ: Угль Исаiи проявлейся Солнце изъ Девственныя утробы возсiя, во тьме заблуждшимъ Богоразумiя просвещенiе даруя.

 

            Царевъ южика бывъ,  Филарете, не превознеслся еси,  Царя царей во образе сирыхъ и убогихъ почитая, любовiю же яко царицею добродетелей украшаяся.

            Евангельски пожив,  Филарете,  сторичный плодъ Тому принесъ,  добрая земля и тучная показался еси Сеятелю Безначальному.

            Образъ милости Богоподобныя показал еси намъ,  светъ твой предъ человеки по слову Господню просiявая,  ко прославленiю же Отца Небеснаго вся подвизая.

Богородиченъ:  Богородицу и Матерь Еммануилеву немолчными песньми величающе отъ Нея Рожденнаго видевше возопiемъ: съ нами Богъ.

 

Песнь 6

Ирмосъ: Гласъ глаголъ молебныхъ отъ болезненныя, Владыко, души услышавъ, отъ лютыхъ мя избави, Единъ бо еси спасенiя нашего виновенъ.

 

            Руце твои даянiи благими освятилъ еси и сердце милостiю разжеглъ еси,  скорби утоляя и озлобленныя утешая, радость же печали вместо принося всемъ.

            Авраама страннопрiимнаго подражая, Троицу Живоначальную почтилъ еси,  Филарете, не во образе трiехъ странникъ Являемую,  но во образе множества убогихъ отъ тебе усердно Служиму.

            Злая, якоже благая,  отъ руки Господни прiемля, Iовлево терпенiе показалъ еси, скорбьми же и лишеньми обуреваемъ, Бога благословилъ еси, благословенiе всехъ праведныхъ наследуя.

Богородиченъ:  Не имамы упованiя, несть намъ надежды,  аще не Ты, Богородице, заступиши ны и отъ бедъ избавиши всесильнымъ предстательствомъ Твоимъ  егоже Сынъ Твой державный не презритъ.

 

Кондакъ гл. 3

Истинно всеизрядная твоя купля зрится/ и мудрою быти судится/ всеми благомудрствующими/ отдалъ бо еси вся дольняя и краковременная/ взыскуя горнихъ и вечныхъ/ темже и достойно стяжалъ еси// веечную славу, милостиве Филарете.

 

Икосъ

Красна и любезна всяка добродетель Христа ради стяжаваема, честенъ постъ и боголюбезно воздержанiе, землю наследуетъ кротость и на небеса возводитъ смиренномудрiе, всякiй грехъ побеждаетъ покаянiе и Богозренiе даруется чистымъ сердцамъ. Обаче милость и любы надъ всеми сими превозносится и на Страшнемъ Судище Христовомъ отъ Судiи Праведнаго первее отъ всехъ истяжавается. Отъ Него же въ той день ты услышиши,  праведниче,  прiиди,  благословенне,  Отца Небеснаго наследуй Царство, от века уготованное и //вечную славу,  милостиве Филарете.

 

Примечанiе: Кондакъ взятъ изъ Четьи Минеи св. Димитрiя Ростовскаго, а Икосъ написанъ автором службы

 

Песнь 7

Ирмосъ: Ветiи явишася отроцы любомудрейшiи древле отъ Богопрiятныя бо души Богословяще, устнами пояху: Пребожественный отцевъ и нашъ Боже благословенъ еси.

 

            Учрежденiе велiе прiуготовивъ,  Царя приходъ и слугъ Его домашнимъ твоимъ возвестилъ еси, нищимъ же и убогимъ домъ твой исполнившимъ возопилъ еси: все слуги Царевы,  посреде же ихъ прiиде ко мне невидимо и Пребожественный Царь, Благословенный Богъ отецъ нашихъ.

            Юнiи и старцы, сиры и вдовицы щедрую десницу твою,  Филарете, благословляху о тебе благодаряще Христа Бога и умильно вопiяху: Пребожественный отцевъ Боже,  благословенъ еси.

            Прiидите благословеннiи Отца Моего, наследуйте Царство яко алкахъ и жаждахъ и болезновахъ и послужисте Ми, возопiетъ Судiя Христосъ ко милостивымъ на Страшнемъ Судищи Своемъ,  ты же тогда,  отче,  неизреченно возвеселишися.      

Богородиченъ:  Агнца Божiя грехи мiра подъемшаго и Кровiю Своею христiаны омывшаго,  моли Девице Богородице,  грехи наша отъяти,  се бо сокрушеннымъ сердцемъ ищемъ Лица Его,  Благословеннаго отъ всея твари.

 

Песнь 8

Ирмосъ: О подобiи злате небрегше преблаженнiи юноши неизменный и живый Божiй образъ видевше, среди огня воспеваху: осуществованная да поетъ Господа вся тварь и превозноситъ во вся веки.

 

            Милосерднаго Самарянина подражая,  не мимоиди мя въ разбойники впадшаго грехи многими,  Филарете,  обаче елей молитвъ твоихъ на душу мою люте уязвленную возлей,  милостиве,  яко да исцелевъ благодарне Богу воззову: да поетъ Господа,  дивнаго во святыхъ Своихъ,  всяческая  тварь.

            Являешися нам мудрый сокровищъ  собиратель  ихже тля не тлитъ и ржа не снiедаетъ,  ихже и в небесных хранилищехъ соблюдаеши, темже и сердце твое тамо пребываетъ,  уста же Господа,  сытости не знающи,  воспевают во веки.

            Тельца златаго древле безумнии почитавшiи осуждаются и телу златому отъ царя въ Вавилоне поставленному премудрiи отроцы не поклонившiися ублажаются, ты же,  Филарете,  вторыя,  а не первыя  подражалъ еси,  истуканъ богатства сокрушая радостне и воспевая: да поетъ Господа всякая тварь во веки.

Богородиченъ:  Херувими Ти кланяются со страхомъ, Богородице,  и Серафими Тя воспевают непрестанно,  воистину бо Небесный Царь доброты Твоея возжела,  Матерiю Своею Тебе нарекъ,  сего ради людiе исповедятся Тебе во веки и въ векъ века.

 

Песнь 9

Ирмосъ: Весь еси желанiе, весь сладость, Слове Божiй, Девы Сыне, Боже боговъ, Господи святыхъ Пресвятый, темъ Тя с Рождшею Тебе величаемъ.

 

            Верою богатство истощивъ,  вся отъ Бога паки прiялъ еси,  верою убогiя прiемля и учреждая  Самаго Бога прiималъ еси, верою пожилъ еси и верою преселился еси во обители вечныя, идеже Бога со праведныхъ лики величаеши.

            Авраамовъ подражателю и Троицы Безначальныя учредителю,  Владычнiй слуго и друже преискреннейшiй,  миловалъ еси всяку тварь,  милость Божiю темъ къ себе преклоняя,  темже милостiю твоею и насъ посети,  вседушно тя величающихъ.

            Любовiю твоею возсiя намъ,  Филарете,  яко солнце просiявый въ праведной кончине твоей,  яко да светло о тебе веселящеся,  Бога во святыхъ Своихъ Дивнаго величаемъ.

Богородиченъ:  Юнiи и старцы, богатiи и убозiи, монаси и мiрстiи, праведницы и грешницы кающiися, прiидите припадемъ к Божiей Матери, вопiюще къ Ней: подъ кровомъ Твоимъ соблюдай насъ присно,  Владычице,  Тя величающихъ.

 

 По  Светильне  Слава Подобенъ «Доме Евфраффовъ»

Солнцу спросиявый доброделанiемъ,  добролюбче истинный,  Солнце Правды ныне явственно зриши,  Егоже моли непрестанно,  милостиве,  отъ бедъ избавити насъ. 

 

+

Из службы Святителю Филарету (Вознесенскому)

Икона Святителя Филарета (Вознесенского) 

 

Тропарь гл. 8

Исповедниче Православия, избранный архипастырю Церкви Христовой,/ последних времен великий светильниче,/Истиннаго Православия хранителю и защитниче,/злоучений новых вечный посрамителю,/святых канонов и догмат божественных учителю,/Богоносный Отче наш Филарете,/моли милостиваго Бога да Церкви мир дарует//и душам нашим велию милость.

 

Кондак гл. 5

Пастырю верный Истинной Церкви Христовой/ Святителю Отче Филарете,/ Богомудрыя деяния великих богословов приим в сердце твоем,/ яко истинный собеседник богооткровенных таин,/Учения Святых Отец проповедал еси мудро,/ призывая всех спасатися во Истинной Церкви Христовой,/ днесь на небесех веселися,/ и мы, чада твоя, зовем ти: / Радуйся Святителю Филарете, / явленный в последняя времена, //веры Православныя великий проповедниче.

 

На «Господи, воззвах»

Стихиры гл. 5, подобен: «Радуйся»

Радуйся, Святителю Христов Филарете,/ благоуханный цвете райский,/ верных просветление,/ Богородицы Вратарницы Монреальской избранниче,/ благочестия чудесный ревнителю,/ нечестивых обличителю,/ светильниче многосветлый,/ Законом Божиим просвещая вся народы,/ Господа Бога нашего моли,/ да свет Христов просвещает души наша,// и уготови нас к пришествию Христову.

Радуйся Божественный Отче Филарете,/ ибо Господь дарова ти премудрость Соломонову,/ целомудрие Иосифа,/ незлобие Моисея,/ Илиину непоколебимую ревность,/ кротость Царя Давида,/ благоразумное терпение праведнаго Иова,/ воистину премудр бе,/ и яко вторый Марк Ефесский,/ веру чисту соблюди,/ Максимово исповедание и мужество показуя,// до конца стоял еси супротив богоотступников.

Радуйся сосуде премудрости,/ радуйся златотканная риза богословия,/ пламенный защитниче правыя веры,/ истинный постниче и подвижниче,/ сердца верных напояя благодатию,/ и злыя намерения неверных яко мечем отсекая,/ Радуйся Евангельской любви истинный делателю,// нищих и убогих скорый и щедрый помощниче.

 

На Литии

Стихира гл. 6

Настало время мрачное всеми народами отпадения,/ и вселенная вся исполнися всякаго зла,/ но нам Господь Премилостивый,/ дарова Тя, Святителю Филарете,/ да яко Давид некогда,/ избиеши мысленнаго Голиафа экуменическаго,/ боряся за Истину Церковную,/ Защитил ест веру Православную,/ последуя учению Святых Отец,/ отгнал еси лжеучителей зловерных,/ и яко ограждение на вся будущия времена,// отлучению от Христовой Церкви их предаде.

 

Слава: гл. 1

Равноангельно на земли пожил еси,/ и днесь на небесех со ангелы ликующе,/ наслаждаяся неизреченной красоты Лица Божия,/ прославляя Его со всеми небесными силами,/ О Богомудре Филарете,/ ревностию уподобился еси Воеводе Небесных Сил,/ Михаилу Архистратигу,/ пред дверьми рая со острым мечем стоящаго,/ Церковь Христова тя с ним прославляет,/ яко в день его памяти пред Престолом Божиим предстал еси,/ И с ним совокупно моли Христа Бога о нас,/ да до конца времен пребудем,/ верными чадами Истиннаго Православия.

  

На Хвалите

Стихиры гл. 3

Яко ревнитель Православнаго благочестия,/ явился еси Отче наш Филарете,/ малым дитятей заповеди Христовы в сердце своем слагая,/ Богом дарованный талант десятирицею умножил еси,/ Просиял еси яко послушник Святых Отец,/ любовию Евангельской спасительной Церковь Божию паствил еси,/ и нам в неведении пребывающим,/ пошли свет Богопознания, да и мы сыны света содеемся,/ О Богомудре Филарете!

Небесный человече и земный ангеле,/ светильник Отечества Своего Отче Филарете,/ по природе был еси человек,/ но по ревности стал еси среди ангелов,/ Яко вторый Илия нечестивии укоряюще,/ Православие защитил еси,/ злоучение экуменическое отлучил еси,/ богохульников анафеме предав,/ и от духовных волков, ложных братии зловерных/ свое стадо сохранил еси.

 

+

Из службы Святителю Филарету (Вознесенскому)

Тропарь гл. 8

Исповедниче Православия, избранный архипастырю Церкви Христовой,/ последних времен великий светильниче,/ Истиннаго Православия хранителю и защитниче,/ злоучений новых вечный посрамителю,/ святых канонов и догмат божественных учителю,/ Богоносный Отче наш Филарете,/ моли милостиваго Бога да Церкви мир дарует// и душам нашим велию милость.

 

Кондак гл. 5

Пастырю верный Истинной Церкви Христовой/ Святителю Отче Филарете,/ Богомудрыя деяния великих богословов приим в сердце твоем,/ яко истинный собеседник богооткровенных таин,/ Учения Святых Отец проповедал еси мудро,/ призывая всех спасатися во Истинной Церкви Христовой,/ днесь на небесех веселися,/ и мы, чада твоя, зовем ти: / Радуйся Святителю Филарете, / явленный в последняя времена, // веры Православныя великий проповедниче.

 

На «Господи, воззвах»

Стихиры гл. 5, подобен: «Радуйся»

Радуйся, Святителю Христов Филарете,/ благоуханный цвете райский,/ верных просвещение,/ Богородицы Вратарницы Монреальской избранниче,/ благочестия чудесный ревнителю,/ нечестивых обличителю,/ светильниче многосветлый,/ Законом Божиим просвещая вся народы,/ Господа Бога нашего моли,/ да свет Христов просвещает души наша,// и уготови нас к пришествию Христову.

Радуйся Божественный Отче Филарете,/ ибо Господь дарова ти премудрость Соломонову,/ целомудрие Иосифа,/ незлобие Моисея,/ Илиину непоколебимую ревность,/ кротость Царя Давида,/ благоразумное терпение праведнаго Иова,/ воистину премудр бе,/ и яко вторый Марк Ефесский,/ веру чисту соблюди,/ Максимово исповедание и мужество показуя,// до конца стоял еси супротив богоотступников.

Радуйся сосуде премудрости,/ радуйся златотканная риза богословия,/ пламенный защитниче правыя веры,/ истинный постниче и подвижниче,/ сердца верных напояя благодатию,/ и злыя намерения неверных яко мечем отсекая,/ Радуйся Евангельской любви истинный делателю,// нищих и убогих скорый и щедрый помощниче.

 

На Литии

Стихира гл. 6

Настало время мрачное всеми народами отпадения,/ и вселенная вся исполнися всякаго зла,/ но нам Господь Премилостивый,/ дарова Тя, Святителю Филарете,/ да яко Давид некогда,/ избиеши мысленнаго Голиафа экуменическаго,/ боряся за Истину Церковную,/ Защитил ест веру Православную,/ последуя учению Святых Отец,/ отгнал еси лжеучителей зловерных,/ и яко ограждение на вся будущия времена,// отлучению от Христовой Церкви их предаде.

 

Слава: гл. 1

Равноангельно на земли пожил еси,/ и днесь на небесех со ангелы ликующе,/ наслаждаяся неизреченной красоты Лица Божия,/ прославляя Его со всеми небесными силами,/ О Богомудре Филарете,/ ревностию уподобился еси Воеводе Небесных Сил,/ Михаилу Архистратигу,/ пред дверьми рая со острым мечем стоящаго,/ Церковь Христова тя с ним прославляет,/ яко в день его памяти пред Престолом Божиим предстал еси,/ И с ним совокупно моли Христа Бога о нас,/ да до конца времен пребудем,/ верными чадами Истиннаго Православия.

 

На Хвалите

Стихиры гл. 3

Яко ревнитель Православнаго благочестия,/ явился еси Отче наш Филарете,/ малым дитятей заповеди Христовы в сердце своем слагая,/ Богом дарованный талант десятирицею умножил еси,/ Просиял еси яко послушник Святых Отец,/ любовию Евангельской спасительной Церковь Божию паствил еси,/ и нам, в неведении пребывающим,/ пошли свет Богопознания, да и мы сыны света содеемся,/ О Богомудре Филарете!

Небесный человече и земный ангеле,/ светильник Отечества Своего Отче Филарете,/ по природе был еси человек,/ но по ревности стал еси среди ангелов,/ Яко вторый Илия нечестивии укоряюще,/ Православие защитил еси,/ злоучение экуменическое отлучил еси,/ богохульников анафеме предав,/ и от духовных волков, ложных братии зловерных/ свое стадо сохранил еси.

 

 

МОЛИТВА СВЯТИТЕЛЮ ФИЛАРЕТУ (ВОЗНЕСЕНСКОМУ)

О святителю отче наш Филарете, Богом избранне, последних времен исповедниче, истиннаго Православия Первоиерарше, предводителю и поборниче, и всех истинно-православных христиан добронадежный пред Богом заступниче, иже престолу Божию предстояй и за ны моляйся: умоли всещедраго Бога, да дарует нам грехов прощение, омыв нас от них покаянием. Спасай ны молитвами твоими от наветов безбожных, даруй нам страх Божий и сподоби нас, да до конца верными чадами Истинной Церкве Христовой пребудем. Укрепи ны во исповедании веры, и да не устрашимся гонений и страданий, но якоже достоит даруй нам пострадати за веру православную, да не отвергнемся Христа, и да не приимем печати проклятаго антихриста.

Не таим мног труд и зной яже подъял еси истиннаго Православия ради, благопохваляем же и проповедуем добрая дела твоя: Царственных Мучеников и новых Исповедников Российских прославление, апостольскаго преемства истинным православным христианом по всей вселенней преподание, всеереси экуменизма анафематствование и непоколебимое слова Христовой истины правоправление.

Помощи, благодати и заступления твоего присно взыскующе, просим молитв и предстательства за ны, повергающе к ногама твоима моление сие.

Не престай творити молитву к Человеколюбцу Богу за малое стадо истинных православных, да дарует мир Церкви Своей, избавляя ю от ересей и расколов, да нас избавит от тьмы греха и страстей, от ловлений сокровенных лукаваго антихриста, да пребудем до смерти неколебими во исповедании святаго Православия, и во еже до конца неосужденно причащатися нам Святаго Тела и Крове Господних от истинных священнослужителей: по кончине же да обрящем милостива и милосерда Господа, Имже сотворени и живем и есмы, Емуже подобает всякая слава, хвала и похваление, честь и поклонение, с Безначальным Отцем и Всесвятым Духом, ныне и присно, и во веки веков. Аминь.

 

 

 

Дополнительно см.:

 

1. Акт о прославлении во святых Русской Истинно-Православной Церковью Первоиерарха РПЦЗ Святителя Филарета (Вознесенского)
http://catacomb.org.ua/modules.php?name=Pages&go=page&pid=1470

 

2. Служба Святителю Филарету (Вознесенскому), составленная к Освященному Собору РИПЦ сестрами сербского монастыря Св. Предтечи и Крестителя Господня Иоанна (ИПЦ Сербии)

http://catacomb.org.ua/modules.php?name=Pages&go=page&pid=1484

 

3. Икона Святителя Филарета (Вознесенского), написанная в ИПЦ Сербии к прославлению на Освященном Соборе РИПЦ

http://catacomb.org.ua/modules.php?name=Pages&go=page&pid=1428

4. Доклад Освященному Собору РИПЦ о подвиге святительского служения Митрополита Филарета (Вознесенского)
   М. Евфросиния (Молчанова), Леснинский монастырь Пресвятой Богородицы, Провемон, Франция

http://catacomb.org.ua/modules.php?name=Pages&go=page&pid=1468

 

5. Слово на прославление Святителя Филарета (Вознесенского) и Отцов-Исповедников Катакомбной Церкви

http://catacomb.org.ua/modules.php?name=Pages&go=page&pid=1472

 

6. Фоторепортаж с Освященного Собора Русской Истинно-Православной Церкви

http://catacomb.org.ua/modules.php?name=Pages&go=page&pid=1480



7. Видео-репортаж с прославления на Освященном Соборе РИПЦ Святителя Филарета (Вознесенского) и Отцев-Исповедников Церкви Катакомбной
   Фильм сделан гостями из Сербии, участвовавшими в Освященном Соборе РИПЦ

http://catacomb.org.ua/modules.php?name=Pages&go=page&pid=1480

 

8. Иконы Святителя Филарета (Вознесенского), третьего Первоиерарха РПЦЗ

http://catacomb.org.ua/modules.php?name=Pages&go=page&pid=1491

 

9. Слова, проповеди, послания, письма Святителя Филарета (Вознесенского), третьего Первоиерарха РПЦЗ

http://catacomb.org.ua/modules.php?name=Pages&go=page&pid=1490

 

 

 

 

 

 

 


© Catacomb.org.ua